BACOOR CITY, CAVITE — Idinaos ng Diocesan Ministry sa Pamilya at Buhay (Family and Life Ministry) ng Diocese of Imus ang programang “Spiritual Warfare for Families: Pagpapalakas ng Pananampalataya sa Tahanan” noong Sabado, Oktubre 3, sa Our Lady of the Sacred Heart Parish, Molino, Bacoor City.

Layunin ng pagtitipon na mapalalim ang pag-unawa ng mga pamilya sa kahalagahan ng pananampalataya, panalangin, at matatag na ugnayan sa Diyos bilang sandigan sa mga hamon na kinakaharap ng pamilya sa kasalukuyan.

Bilang resource speaker, nagbahagi si Rev. Fr. Mark Anthony T. Reyes, Priest Director ng Deliverance Ministry at parish priest ng Our Mother of Perpetual Help Parish, Springville Heights Phase 3, Molino 7, Bacoor City, tungkol sa pananampalataya at mga espirituwal na hamon na maaaring maranasan ng isang tao at ng pamilya.

Binigyang-diin ni Fr. Mark na ang pagkilala sa Diyos ang nagbubukas ng daan tungo sa isang malalim at maibiging relasyon sa Kanya. Hinikayat niya ang mga pamilya na manatiling nakaugat kay Kristo sa pamamagitan ng panalangin, mga Sakramento, at patuloy na pagbabagong-buhay.

Tinalakay rin ang konsepto ng spiritual warfare o pakikipaglaban sa espirituwal na aspeto ng buhay, kabilang ang tukso at iba pang karanasang maaaring magpahina sa pananampalataya. Binigyang-diin ang kahalagahan ng discernment o pagkilala sa mga espiritu, gayundin ang paghingi ng wastong gabay sa Simbahan at tulong mula sa mga kwalipikadong propesyonal kung kinakailangan.

Isa sa mga pangunahing mensahe ng programa ang pamilya bilang unang tahanan ng pananampalataya. Hinikayat ang mga magulang na manalangin kasama ang kanilang mga anak, makinig sa kanila nang may malasakit, patatagin ang pagsasama ng mag-asawa, at gawing lugar ng panalangin, pagkakaisa, at pagmamahalan ang kanilang tahanan.

Binigyang-halaga rin ang Banal na Misa at Sakramento ng Kumpisal bilang mahahalagang paraan upang mapalalim ang ugnayan ng bawat miyembro ng pamilya sa Diyos.

Sa pagtatapos ng programa, hinikayat ang mga pamilya na patuloy na lumapit kay Kristo, manalangin nang sama-sama, magmahalan, magpatawad, at mamuhay sa pananampalataya.

Ang gawain ay bahagi ng patuloy na pagsisikap ng Diocesan Ministry sa Pamilya at Buhay ng Diocese of Imus na samahan, hubugin, at patatagin ang mga pamilya bilang mga tahanan ng pananampalataya at mga munting Simbahan (Domestic Church).